Historikk

Steinsvik Olivine AS vart etablert i 1995 med mål om å utvinne olivin frå førekomsten i Vassbakkedalen i Volda.

Etter fleire år med undersøkingar og planlegging starta selskapet sin fyrste produksjon i 2004, opphavleg som underjordisk drift. Allereie året etter vart den fyrste lasten skipa ut.

På grunn av høge sikringskostnader med bolting av lausblokker i tunnelane ved underjordsdrifta, vart drifta lagt om til dagbrot i 2006.

Etter ein konkurs i 2009 vart verksemda teken opp att under nytt eigarskap året etter. I åra som følgde vart det lagt stor vekt på kartlegging, testproduksjon og miljøtiltak for å sikre ei meir robust og berekraftig drift.

I dag framstår selskapet som ei moderne bergverksbedrift med fokus på kvalitet, tryggleik og vidareutvikling av olivinen sine bruksområde.

Dagens verksemd er basert på dagbrot i Raudehamaren, der uttaket skjer frå kote 100 til 275 moh.

Råmassen blir grovknust og finknust i brotet og frakta vidare til Treneset, 3,2 km unna.

 Anlegget har fleire knuse- og siktesteg som bearbeider olivin til ønskt fraksjon, vanlegvis 0–4 mm eller 0–8 mm sand.

Lagerkapasiteten er på rundt 40 000 tonn, medan produksjonskapasiteten ligg på om lag 180 000 tonn i året, med moglegheit for auke.

Utskipingsanlegget kan laste båtar med inntil 10,5 meters djupgåande og har ein lastekapasitet på ca. 1 200-1500 tonn per time. Dette gir fleksibilitet og gjer det mogleg å levere store volum effektivt til kundar både i Europa og andre marknader.

Selskapet har eige salskontor i Tyskland (Steinsvik Olivine Sales GmbH), og har underleverandøravtale med Fromberger GmbH i Duisburg der olivinen blir tørka, sortert og pakka for distribusjon.

Utvikling 

Som ein del av den vidare satsinga planlegg Steinsvik Olivine AS å utvide produktporteføljen, og driv forsking saman med norske og internasjonale miljø på nye bruksområde innan miljøteknologi.

Målet er at slike produkt skal kunne tilbydast direkte frå anlegget i Steinsvik innan få år, som ein del av selskapet si kontinuerlege utvikling og tilpassing til marknaden sine behov.